Ер участкаларига эга бўлиш ва қурилиш ишларини амалга оширишнинг қонуний механизмлари мавжуд бўлишига қарамасдан фуқаролар томонидан ўзбошимчалик билан ер участкаларини эгаллаб олиб, ноқонуний тарзда бино-иморатлар қуриш ҳолатлари кузатилмоқда.
Бундай ҳолларда ўзбошимчалик билан иморат қурган шахс унга мулк ҳуқуқини ололмайди, уни тасарруф этишга – сотишга, ҳадя этишга, ижарага беришга, бошқа битимлар тузишга ҳақли эмас. Бундай иморат суднинг қарорига биноан уни қурган шахс томонидан бузиб ташланиши лозим.
Мажбурий ижро бюроси Жалақудуқ туман бўлими иш юритувига ҳам айнан шу мазмундаги ижро ҳужжати келиб тушган бўлиб, унда Жалақудуқ тумани, Жалақудуқ шаҳар харитаси 6092-контуридаги ер майдонининг 0,028 гектар қисмини туман захирасига қайтариш ва ушбу майдонда жойлашган ноқонуний равишда қурилган қурилмаларни буздириш белгиланган.
Жавобгар Н.И. бюро ходимлари томонидан огоҳлантирилган, берилган ихтиёрий муддат ичида ноқонуний қурилмаларни бузиши керак бўлса-да, уларни бузмаган. Шу сабабли, масъул идора вакиллари иштирокида мажбурий ижро ҳаракатлари олиб борилиб, ноқонуний қурилмалар буздирилиши таъминланди.
