Фото: APЯпониянинг энг кекса фуқароси ва дунёдаги энг кекса инсон Томико Итоока 116 ёшида вафот этди. Итоока 2019 йилдан буён яшаган Асия шаҳридаги қариялар уйи вакили Kyodo агентлигига ўлим табиий сабабларга кўра содир бўлганини
маълум қилди.
Томико Итоока 1908 йил май ойида Япониянинг Осака шаҳрида туғилган. 20 ёшида аёл турмушга чиққан, унинг тўртта фарзанди бўлган. Томико Итоока 1979 йилда 71 ёшида бева қолган, аммо фаол турмуш тарзини давом эттирган ва спорт билан шуғулланган.
Томико Итоока 2024 йил сентябрь ойида Ер сайёрасининг энг кекса фуқароси ва дунёда яшовчи одамларнинг энг кексаси деб тан олинган. Ўша пайтда у 116 ёш-у 116 кунлик эди. Унгача испаниялик Мария Браняс Moreра Ер юзидаги энг кекса одам ҳисобланган. У 2024 йил август ойида 117 ёш-у 169 кунлигида вафот этган.
Жорий йилнинг 2 январь куни Венгрияда Олимпия ўйинлари тарихидаги энг кекса совриндор аёл Агнеш Келети вафот этгани ҳақида хабар берилганди. 9 январь куни у 104 ёшга тўлиши керак бўлган.
Фото: Getty ImagesКелети 25 декабрь куни пневмония туфайли юрак етишмовчилиги ва нафас олиши қийинлашгани учун касалхонага ётқизилган. 2 январь куни эрталаб вафот этган. Марҳума спорт гимнастикаси бўйича беш карра Олимпия чемпиони ҳисобланади. У 1940 йилда Венгриянинг биринчи чемпионатида ғолиб чиққан. Шундан кейин келиб чиқиши яҳудий бўлгани учун унга ҳар қандай спорт билан шуғулланишни тақиқлашган.
Иккинчи жаҳон урушидан сўнг Агнеш Келети яна спорт билан шуғуллана бошлади ва 1952 йилда ўзининг биринчи Олимпиада олтин медалини қўлга киритган. У жами 10 та Олимпиада медалига (бешта олтин, учта кумуш ва иккита бронза) ҳамда учта жаҳон чемпионати медали (битта олтин, кумуш ва бронза) сазовор бўлган.
1957 йилда Келети Исроилга кўчиб ўтган, 2015 йилда эса ватани Будапешт шаҳрига қайтиб келган. Спортдаги фаолиятини тугатгач, Келети Тель-Авивда жисмоний тарбия бўйича мураббий сифатида ишлаган, миллий терма жамоага раҳбарлик қилган. Бундан ташқари, у гимнастика мусобақаларида ҳакам сифатида ҳам таклиф этиларди.
