Энг кўп кутилган Осиё кубоги якунланиш арафасида турибди. Биз учун бу мусобақа жуда оғир ўтди. Жароҳатлар, пенальтилар сериясидаги аламли мағлубият...
Мусобақада терма жамоамиз қандай даражада қатнашганини баҳолашни мухлисларга қолдирамизда, биз бу мусобақага қайси футболчиларимиз учун трамплин бўлгани ҳақида
тўхталамиз.
Осиё кубогида қатнашиш учун рўйхатдан ўтказилган Ўзбекистон терма жамоасининг якуний таркибидаги 26 футболчидан 9 нафари легионер эди.
Булар Рустам Ашурматов (“Рубин”, Россия), Жалолиддин Машарипов (“Пансерриакос”, Греция), Отабек Шукуров (“Фотиҳ Карагюмрюк, Туркия), Бобур Абдухолиқов ва Шаҳбоз Умаров (“Ордабаси”, Қозоғистон) Абдулла Абдуллаев (“Хор-Факкан”, Бирлашган Араб Амирликлари), Игорь Сергеев (“Патхум Юнайтед”, Таиланд), Аббос Файзуллаев (ЦСКА, Россия), Абдуқодир Ҳусанов (“Ланс”, Франция).
Мусобақа бошланишидан аввал Азизбек Амонов ҳам “Насаф”дан кетиб, Абдулла Абдуллаевнинг жамоадошига айланди.
Осиё кубоги давомида миллий терма жамоамизнинг бир неча футболчилари ўзига янги жамоа топди. Айримлари фаолиятида илк бор легионер мақомини олди.
Демак, жамоасини алмаштирган футболчиларимиз ҳақида маълумот бериб ўтамиз:
Умарбек Эшмуродов (“Селенгор”, Малайзия)Умарбек Эшмуродов мусобақа давомида шубҳасиз, энг яхши ўйин кўрсатган ҳимоячиларимиздан бўлди. 15 декабрь куни "Насаф" билан хайрлашган Эшмуродов фаолиятини Малайзияда давом эттиришга қарор қилди. “Селенгор” ҳимоячимиз билан 3 йиллик шартнома имзолади.
Ҳожимат Эркинов (“Ал-Ваҳда”, Бирлашган Араб Амирликлари)Россиядаги фаолияти омадли чиқмаган Ҳожимат Эркиновни мавсум аввалида “Пахтакор” клуби Москванинг “Торпедо” жамоасидан ижарага олганди. “Шерлар”нинг чемпионлигига катта ҳисса қўшганидан сўнг, бу вингер термадан ҳам чақирув олди. Сурияга қарши ёрқин ўйинидан сўнг, Эркиновни “Ал-Ваҳда” вакиллари диққат билан кузата бошлади. Термамизнинг иштироки якунлангач, БАА клуби Эркиновнинг трансферини эълон қилди.
Жалолиддин Машарипов (“Истиқлол”, Эрон)Терма жамоамиз асосий сардори Элдор Шомуродовнинг мусобақани ўтказиб юбориши натижасида Жалолиддин Машарипов Осиё кубогида сардорлик қилди. Грецияга жароҳат билан борган Жалолиддин “Пансерриакос”да узоқ қолмади. Шартнома бекор қилингач, Машарипов фаолиятини юртимизда давом эттириши мумкинлиги ҳам айтилди.
Қатарга қарши аламли мағлубиятдан сўнг, Жалолиддин Эроннинг “Истиқлол” жамоасига ўтиши маълум бўлди. Эслатиб ўтамиз, Машарипов Грецияга йўл олишидан аввал ҳам “Истиқлол” жамоасидан жиддий қизиқиш бўлган эди.
Остон Ўрунов (“Персеполис”, Эрон)Остон Ўрунов “Навбаҳор” билан хайрлашиб, эркин агент мақомида юрган эди. Жуда кўпчилик 23 ёшли футболчимизнинг “Навбаҳор”даги ёрқин ўйинларидан сўнг, яна Россияга қайтишини кутганди. Бироқ, Ўруновга Эрондан зўр таклиф келди ва Остон “Персеполис” билан 2 йиллик шартнома имзолади.
Азиз Турғунбоев (“Сивасспор”, Туркия)Азиз Турғунбоев ушбу Осиё кубогига захира футболчиси сифатида келганди, лекин жароҳатлар қанот вингерини асосий таркиб футболчисига айлантирди, фақат бошқа позицияда. 29 ёшли футболчимиз 3-турда захирадан майдонга тушиб Австралияга тарихий гол урган бўлса, нимчорак финалда асосий таркибда майдонга тушиб, Таиланд дарвозасини ҳам ишғол этди. Ушбу ёрқин ўйинлардан сўнг, “Сивасспор” футболчимизни ўз сафига қўшиб олди.
Отабек Шукуров (“Кайсериспор”, Туркия)Отабек Шукуров “Фотиҳ Каракюмрюк”ни тарк этган бўлишига қарамай, Туркияда қоладиган бўлди. Манбаларнинг таъкидлашича, “Кайсериспор” тажрибали ярим ҳимоячи билан келишувга эришган ва уни жамоага қўшиб олган.
Кутилаётган трансфер:“Пахтакор” футболчиси Диёрбек Холматов ҳам Европага йўл олиши кутилмоқда. Бир неча манбаларнинг таъкидлашича, 21 ёшли ярим ҳимоячига Италиядан таклиф бор.
“Лечче” жамоаси ўзбек футболчини ўз сафига қўшиб олишни режалаштирмоқда. Демак, Қатардаги Осиё кубоги Диёрбек Холматовнинг фаолиятида ҳам бурилиш нуқтаси бўлиши мумкин.
Фарҳод Тулкунов
ЎзЖОКУ талабаси
