“Рома” қишки трансферлар вақтида бир неча ўзгаришлар қилишни режалаштирмоқда. Асосий эътибор, Жозе Моуриньога керак бўлмай қолган ўйинчиларни бошқа жамоаларга ўтказиб, португалиялик мураббий таркибда кўришни истаётган янги ижрочиларга жой очишдан иборат бўлади. Corriere dello Sport нашрининг ёзишича, Рим клуби мутасаддилари январда пойтахтликлар билан хайрлашадиган дастлабки уч футболчи номини аниқлаб олди. Булар нидерландиялик ҳужумкор футболчи Жастин Клюйверт ва унинг ҳамюрти – Моуриньо билан келиша олмай қолган Рик Карсдорп ва яхши спорт формасига қарамай, етарли даражада ўйин амалиётига эга бўлмаётган форвард Элдор Шомуродовдир. Жастин Клюйверт 23 ёшли футболчи “Аякс”дан 2018 йили 17,25 миллион еврога трансфер қилинган. Бироқ, пойтахт “бўрилари” сафига қўшила олмади. Дастлаб, “Лейпциг” ва “Ницца”га ижарага берилди. Бу мавсум олдидан “Валенсия”га жўнатилган. Испания чемпионатида ўзини кўрсата олди. “Валенсия”нинг италиялик бош мураббийи Женнаро Гаттузо клуб раҳбариятидан Жастинни сотиб олишни талаб қилмоқда. Клюйверт ҳам Ла Лигада қолишга қарши эмас. “Рома” ўзига керак бўлмай қолган футболчидан қутилишга ҳаракат қиляпти. Пойтахтликлар ўз ўйинисини 12-15 миллион еврога баҳолаган. Январда томонлар бу масалани охирига етказиб қўйиши кутилмоқда. Рик Карсдорп Нидерландиялик ҳимоячи 2017 йилда “Фейеноорд”дан 16 миллион еврога трансфер қилинган. Шундан сўнг яна бир мавсум ўзини тарбиялаган жамоада тўп тепганидан кейин фаолиятини тўлиқ “Рома”га бағишлади. Бугунги кунда Карсдорп римликларнинг энг қанотдаги асосий футболчиси. Жозе Моуриньо таклифи билан ёзда олиб келинган Меҳмет Зеки Челик ички рақобатда нидерландиялик ҳамкасбига рақобат кўрсата олмаяпти. Лекин “Сассуоло”га қарши ўйиндаги биргина хато Жозе Моуриньонинг ғазабига сабаб бўлди. Рик устозининг муомаласини кўтара олмади. Жозе уни ҳайдади. Карсдорп кетиши тобора ойдинланиб қолмоқда. Харидорлар бор. “Рома” уни 10 миллион еврога бутунлай қўйиб юбормоқчи. Элдор Шомуродов “Рома” ўзбек ҳужумчисини катта умидлар билан олиб келганди. 2021 йилнинг ёзида бу ҳужумчи учун пойтахтликлар “Женоа”га 18 миллион евро тўлаган. “Бўрилар” сафига қўшилганидан кейин Шомуродовга Жозе Моуриньо етарли имкон бермади. Ёзда салоҳияти юқори бўлган Элдорни Италия, Туркия, Германия, Франция, Россия, Саудия Арабистони клублари сўраб, “Рома”га мурожаат қилди. Бир неча клуб ишни охиригача етказиш мақсадида музокара ҳам олиб борди. Жозе Моуриньо албатта имкон беришини ваъда қилиб, ҳужумчимизни қўйиб юбормади. Элдор унга ишониб Римда қолди. Лекин чемпионат бошланганидан бери А Серия ва Европа лигасида саккиз марта майдонга тушириб, атиги 151 дақиқа ўйнатганини Моуриньо ваъда қилган имконият сифатида қабул қилиб бўлмайди. - Элдор Шомуродовга Италиядан таклифлар кўп. Унинг ёзда амалга ошмаган трансфери қишда жамоадан кетишида қўшимча иштиёқ бағишлаши керак, - деб ёзмоқда “Рома” футбол клуби фаолиятини ёритиб бораётган https://romapress.net сайти. Дарҳақиқат, Шомуродовнинг ўзи ҳам ҳозирги вазиятдан тўғри хулоса чиқаргандек, туюлмоқда. Чунки Италия матбуоти “Торино”га ўтишга мойиллик билдиргани ҳақида ёзмоқда. Демак, январда катта эҳтимол билан легионеримиз фаолиятида ўзгариш бўлади.
