Фото: Own wooden house Беларусь Ўзбекистонга ёғоч уйлар етказиб бериш устида ишламоқда. Бу ҳақда Беларусь бош вазири Роман Головченко хабар берди. Унинг сўзларига кўра, Беларусь ёғоч уйларига катта қизиқиш бор, яқинда Ғарбий Европада ушбу маҳсулотларнинг кичик партиялари анча юқори нархларда сотиб олинган. «Ўзбекистонда ҳам бундай уйларга талаб бор. Шунинг учун биз уй йиғиш тўпламларини партиявий ишлаб чиқариш ва сотиш масалаларини муҳокама қилдик. Агар рақобатбардош нарх таклиф қилсак, менимча, бу бизнинг янги бозоримиз бўла олади», — деб ҳисоблайди Головченко. Аввалроқ Беларусь Тошкентда трамвайни қайта тиклаш лойиҳасида иштирок этишни режалаштираётгани ҳақида хабар берилган эди. Беларусь зарур инфратузилма, режалаштириш ва ҳаракат таркибини етказиб бериш билан боғлиқ комплекс ечимларни тақдим этишга тайёр.
