Кадр: Telegram Inkuzart тахаллуси билан ижод қилаётган кўча рассоми Абдураҳмон Тошкентдаги Коррупцияга қарши курашиш агентлигини ўраб турган деворга янги стрит-артини чизиш жараёни тасвирланган видеони эълон қилди. Унда «Шум бола» фильмидаги қаҳрамон Қоравой қопни елкасига ортиб, олиб кетаётгани тасвирланган. Қопга эса «коррупция» ёзуви туширилган, видео остидаги изоҳ ҳам шундай — «Коррупция». Коррупцияга қарши курашиш агентлиги директори Акмал Бурҳонов мазкур стирт-артга изоҳ билдириб, агентлик мазкур граффити муаллифининг креатив ёндашувларни доимо қўллаб-қувватлашини таъкидлаган. «Биз ҳар куни коррупция балосидан тезроқ қутулиш, юртимиз ривожига ўз ҳиссамизни қўшишга ҳаракат қиламиз. Бироқ коррупция иллати ҳанузгача елкамизда оғир юк бўлиб қолмоқда. Бу юкдан қанча тез қутулсак, олдимизга қўйилган мақсадларга шунча тез эришамиз. Бунинг учун нафақат Коррупцияга қарши курашиш агентлиги, балки аҳолининг барча қатламлари фаол иштирок этишлари, кўмаклашишлари керак. Агентлик мазкур граффити муаллифи @inkuzart’нинг ижодий ғоясини ва шу каби коррупцияга нисбатан муросасизликка қаратилган креатив ёндашувларни доимо қўллаб-қувватлайди», — деб ёзади Бурҳонов. Эслатиб ўтамиз, 2021 йилнинг сентябрь бошида @inkuzart Ўзбекистон автомобиль бозоридаги монополияга бағишланган стрит-арт чизганди. Унда машина учун узун навбат ва навбат бошида қизил шапкали инсон тасвирланганди. Кейинроқ ушбу тасвир тўлиқ ўчириб ташланган, пойтахт ҳокимлиги ва «Ўзавтосаноат» бу ишга алоқаси йўқлигини маълум қилган эди. Ноябрда эса кўча рассомининг Тошкентда бензин нархи ошишига бағишланган стрит-арт ўчириб ташланганди. 2022 йилнинг 18 февраль куни эса Inkuzart’га тегишли турли формулалар билан деворга чизилган Алберт Эйнштейннинг портрети бўяб ташланган. Чилонзор туман ҳокимлиги стрит-артининг ўчирилишига туман ҳокимининг буйруғи эмас, маҳалла фаоллари сабабчи бўлганини маълум қилган.
