Сирдарё вилоятининг Сардоба туманида 42 ёшли фуқаро А.М.га тегишли Nexia автомобили номаълум шахс томонидан олиб қочилди, деб хабар беради Тергов департаменти. 9 апрель куни соат 06:15 да Сардоба тумани Турон кўчасида яшовчи фуқаро Сирдарё вилояти 102 қисқа рақамига мурожаат қилиб, номаълум шахс томонидан ишончнома қоғози асосида бошқарувида бўлган оқ рангли Nexia русумли автомашинаси эшиги очиқ ва калити жойида қолганидан фойдаланиб, яшаш уйи олдидан олиб қочиб кетгани ҳақида маълум қилган. Фуқаро ушбу номаълум шахсларни топишни ҳамда уларга нисбатан қонуний чора кўришни сўраган. Мазкур ҳолат юзасидан Сардоба тумани ИИБ ҳузуридаги Тергов гуруҳи томонидан номаълум шахсга нисбатан Жиноят кодексининг 267-моддаси 1-қисми (транспорт воситасини олиб қочиш) билан жиноят иши қўзғатилган. Олиб борилган тергов-тезкор ҳаракатлари натижасида, жабрланувчига тегишли автомашина Сардоба тумани «Қўйитош» маҳалласи ҳудудидан ўтувчи автойўлнинг 6-километрида тўлиқ ёнган ҳолатда топилган. Автомашина кўздан кечирилган вақтда номаълум шахс томонидан автомашинанинг давлат рақамлари ва муқаддам автомашинада мавжуд бўлган газ баллон ҳамда орқа юкхонасидаги захира ғилдираги ечиб олиб кетилгани аниқланган. Тергов-тезкор ҳаракатлар давом эттирилиб, мазкур жиноятни Сардоба туманида яшовчи муқаддам судланган 30 ёшли К.Р. содир этгани, унинг яшаш хонадони тинтув қилинганида олиб қочилган Nexia русумли автомашинага ўрнатилган бир дона газ баллон ҳамда бир дона автомашина захира ғилдираги мавжудлиги аниқланиб, ашёвий далил тариқасида расмийлаштириб олинган. Мазкур жиноят иши бўйича К.Р. гумон қилинувчи тариқасида жалб қилиниб, унга нисбатан Жиноят кодексининг 267-моддаси 2-қисми «г» банди ва 173-моддаси 1-қисми (мулкни қасддан нобуд қилиш ёки унга зарар етказиш) билан айблов эълон қилиниб, унга нисбатан қамоққа олиш тарзидаги эҳтиёт чораси қўлланган.
