Фото: Unsplash Дубай ҳукумати хорижлик иқтидорли фрилансерлар (ўзини ўзи банд қилган шахслар) учун Talent Pass номли уч йиллик янги визани жорий этади, деб хабар беради Khaleej Times. Таъкидланишича, амирлик бу каби ташаббус орқали иқтисодиёт, ОАВ, таълим, технология, санъат, маркетинг ва консалтинг йўналишини ривожлантириш учун махсус кўникмаларга эга креатив кадрларни жалб қилмоқчи. Янги Talent Pass ҳужжати ўз эгасига уч йиллик яшаш ва DAFZ ҳудудидан офис учун биноларни ижарага олиш ҳамда ҳозирда 1800 дан ортиқ компания жойлашган илғор экотизимли фризонадан фойдаланиш имконини беради. «2021 йил баҳорида ишга туширилган фризона ҳудудида ижодкорлар яшаши, ишлаши, ўз асарларини намойиш этиши, маҳсулот сотиши ва маҳорат дарслари ўтказиши мумкин бўлади», — дейилади хабарда. Стратегияга кўра, яқин 5 йил ичида Дубайдаги креатив компаниялар сони 8 мингдан 15 мингга етиши, амирликда яшайдиган ижодий мутахассислар сони эса 70 мингдан 150 мингга етиши керак. Эслатиб ўтамиз, 2021 йилнинг январида Бирлашган Араб Амирликлари (БАА) ҳукумати қонунга чет элликларнинг баъзи тоифаларига ушбу мамлакатда фуқаролик олиш имконини берувчи тузатишларни қабул қилганди. Унга кўра, фуқароликка даъвогарларнинг аризалари ҳукумат ҳамда ижро этувчи ҳокимиятнинг маҳаллий бошқармалари томонидан кўриб чиқилади. Фуқаролик олиш усҳун, хусусан, инвесторлар, ихтирочилар, олимлар, шифокорлар, рассомлар ва уларнинг оила аъзолари даъвогарлик қилиши мумкин. Ҳар битта тоифа учун муайян талаблар белгиланган.
