Жорий йилнинг 11 январь куни Туркистон вилоятидаги тўртта туман ҳокимиятлари Чимкент шаҳрида январь воқеалари чоғида қурбон бўлган тўққиз киши дафн этилганини тасдиқлади. Улар Сариоғоч, Қазигурт, Жетисой ва Мақтаорол туманларидан бўлган.
Марҳумларнинг жасадлари Чимкентдаги морглардан олиниб, улар яшаган қишлоқларга етказилган. Ўлганларнинг барчаси тинч аҳоли вакилларидир.
Байдибек, Сўзак, Ўтрор, Ўрдабоши, Тўлабий, Сайрам, Шардара туманлари ва Арис шаҳри ҳокимиятлари Озодликнинг қозоқ хизматига Чимкентдаги акциялар чоғида тинч аҳолидан ҳеч ким нобуд бўлмаганини билдирган.
10 январь куни Сариоғоч туманида Олмаотадаги ҳужумлар чоғида ҳалок бўлган Чегарачилар академияси курсанти Даулет Жупарбеков дафн этилган.
Қозоғистон ИИВга кўра, тартибсизликлардан сўнг қарийб 10 минг киши ички ишлар бўлимларига олиб келинган. Январь воқеалари қурбонларининг аниқ сони очиқланмаган. Аввалроқ ҳукумат 164 киши ўлганини маълум қилган эди, аммо кейин техник хатога йўйилиб, ушбу маълумотга раддия берилган.
Чимкентда норозилик акцияси 4 январь куни бошланиб, 5 январда шаҳар ҳокимияти олдида давом этган эди. Шаҳар полиция департаменти 177 кишига нисбатан маъмурий ва 57 кишига нисбатан жиноят ишлари очилганини билдирган.
Маъмурий ва жиноят ишлари фигурантлари орасида фаоллар ҳам бор. 10 январь куни Чимкент шаҳри соғлиқни сақлаш бошқармаси намойишлар чоғида 120 дан зиёд киши турли даражадаги жароҳатлар билан шифохоналарга келтирилгани, улардан беш нафарининг аҳволи оғирлигини маълум қилган.
