Туркманистоннинг Лебап вилоятида давлат идоралари хизматчилари мамлакат президенти Гурбангули Бердимуҳамедовнинг янги портретларини сотиб олишга мажбурланмоқда – янги портретлар эскисидан фақат камзул ранги билан фарқ қилади.
Озодликнинг туркман хизмати хабарига кўра, президентнинг янги портретлари вилоятдаги умумтаълим мактаблари синфхоналарига аллақачон илинган. ОТМларга эса президент портретларини алмаштириш учун 15 январгача муҳлат берилган. Ўтган йилги портретларда президент камзулининг ранги қора эди, янги портретлар тўқ кўк рангли кийимда олинган.
Қайд этилишича, портретни рамкаси билан бирга алмаштириш тахминан 100 манатга (29 доллар) тушади. Фақат расмнинг ўзи алмаштирилганда эса давлат хизматчиси 40-50 манат тежаб қолиши мумкин. Шу боис кўпчилик президентнинг янги фотосуратини сотиб олиб, эски рамкаларга жойлашни маъқул кўрмоқда.
Декабрь ойида Озодлик Лебап вилоятида мактаблар, касалхоналар ва поликлиникаларга президентнинг янги шеъри битилган плакатлар ва унинг янги портретлари мажбурлаб сотилгани ҳақида хабар қилган эди. Ўшанда бюджетдан ойлик оладиган ҳар бир ходимдан 40 манатдан (11 доллар) пул йиғиб олинган.