Ўзбекистон бош вазири Абдулла Арипов Алихан Смаиловни Қозоғистон бош вазири этиб тайинлангани муносабати билан табриклади. Бу ҳақда бош вазир матбуот хизмати маълумот тарқатди.
Икки мамлакат бош вазирлар ўртасидаги телефон мулоқоти, хабарномага кўра, 11 январь куни бўлиб ўтган.
Қайд этилишича, суҳбат чоғида “Олий ва юқори даражадаги учрашувлар чоғида эришилган келишувларни биргаликда изчил амалга ошириш, очиқлик, анъанавий дўстлик ва яхши қўшничиликка асосланган кўп қиррали стратегик шериклик ҳамда иттифоқчилик муносабатларини янада кенгайтиришни давом эттириш”га урғу берилган.
Сешанба куни Қозоғистон президенти Қасим-Жомарт Тоқаев парламент қуйи палатасига Алихан Смаиловни бош вазир лавозимига тайинлаш бўйича таклиф киритгани, мазкур номзодни йиғилишда иштирок этган депутатларнинг барчаси ёппасига дастаклагани ҳақида Озодлик аввалроқ хабар қилган.