Америка Қўшма Штатлари Босния ва Герцеговина Президиуми аъзоси Милорад Додикка қарши санкциялар жорий этди. Бу ҳақда АҚШ Молия вазирлиги сайти орқали маълум қилинган.
Вашингтон Додикни 1992–1995 йиллардаги урушдан сўнг Босния ва Герцеговина ўртасида эришилган оташкесимга оид сулҳ шартномасини бузганликда айблаган.
АҚШ Молия вазирлиги Додикни коррупцияда айблаб, сиёсатчининг хатти-ҳаракатлари Босния ва Герцеговина ҳудудий яхлитлиги учун таҳдид бўлиб ҳисобланишини билдирган.
Бундан ташқари, Додикка алоқадор Alternativna Televizija телеканалига нисбатан ҳам чеклов чоралари киритилган. Вазирлик ҳужжатида сиёсатчи канални шахсан назорат қилиши ва қалтисроқ сиёсий мавзулардаги материалларни ўзи билан мувофиқлаштиришни талаб қилиши айтилган.
Додик АҚШ Молия вазирлиги қарорини “бемаъни” деб атаган.
Вашингтон 2017 йилда ҳам Додикка қарши санкциялар жорий қилган эди. Ўшанда у Босния ва Герцеговина таркибига кирувчи Сербия республикаси президенти лавозимини эгаллаб турган эди. Шу тариқа сиёсатчига нисбатан чеклов чоралари ўзгармайдиган бўлди. Агар унинг номи бир рўйхатдан ўчирилган тақдирда ҳам, бошқа рўйхатга кўра унга нисбатан санкциялар давом этаверади.
