Қозоғистондаги Ақтау аэропорти халқаро парвозларни амалга оширишни тўхтатгани важидан 5 январь куни амалга оширилиши режаланган Урганч – Ақтау – Урганч йўналиши бўйича (HY-9725/9726) мунтазам қатнов бекор қилинган.
Бу ҳақда маълумот тарқатган Uzbekistan Airways авиаширкати мазкур йўналиш бўйича парвозлар қачон тикланиши мумкинлигига аниқлик киритган эмас, фақат парвоз кунларига оид қўшимча маълумот кейинроқ тақдим этилишини билдирган, холос.
“Йўловчилар 5 январь кунига Ақтауга бекор бўлган парвозлар авиачипталарининг тўлиқ қийматини чипта сотиб олинган жойда қайтариб олишлари ёки бошқа санага бепул қайта бронлаш ҳуқуқига эга”, дея қўшимча қилган Uzbekistan Airways матбуот хизмати.
Қозоғистонда суюлтирилган газ нархи ошиши ортидан бир неча кун аввал Жанаўзен ва Ақтау шаҳарларида бошланган норозилик чиқишлари кейинроқ бутун мамлакат бўйлаб ёйилгани ҳақида Озодлик аввалроқ хабар қилган.