Буюк Британия қироличаси Елизавета II шифокорларнинг тавсиясидан кейин Глазгода бўлиб ўтадиган БМТнинг иқлим ўзгариши бўйича доиравий конвенцияси саммитига ташрифини бекор қилган.
Букингем саройидаги манбаларга кўра, қиролича тадбирда қатнаша олмаслигидан хафа бўлган. Шунга қарамай, у саммит иштирокчиларига видеомурожаат йўллайди.
Аввалроқ Елизавета II касалхонада бир кеча қолганидан бир ҳафта ўтиб биринчи марта омма олдига кўриниш берган эди. Қайд этилишича, қиролича онлайн учрашувларни Беркширдаги Виндзор қасридан ўтказган. Суҳбат чоғида у кайфияти яхши эканлигини таъкидлаган.
Бунгача «Telegraph» газетаси соғлиғига эҳтимолий таҳдид туфайли 95 ёшли қиролича энди фарзандлари ёки набираларидан бири ҳамроҳлигида иш сафарига бориши, зарурат туғилганда унга дам олиш имконини бериши ҳақида хабар берган эди.
Ўтган ҳафта Елизавета II Шимолий Ирландияга ташрифини бекор қилганидан кейин касалхонага ётқизилган эди.
РБК
