Бишкекдаги эпидемиологик вазият «кескин» бўлиб қолмоқда. Шу сабабдан шаҳарда санитария назорати кучайтирилади. Бу ҳақда пойтахт ҳокимлиги маълум қилди.
Хусусан, 1 апрелдан бошлаб савдо марказларида болалар кўнгилочар муассасалари фаолияти вақтинча тўхтатилади.
Ушбу чеклов ҳозирча икки ҳафта муддатга жорий қилинади.
Сўнгги ҳафталарда Қирғизистонда коронавирусга чалинганлар сони кўпая бошлади.
Ҳукумат тиббиёт муассасаларни эпидемиянинг учинчи тўлқинига ҳозирлик кўришни буюрди. Вирус юқтириш ҳолатлари асосан пойтахт Бишкек ва Чуй вилоятида қайд этилмоқда.
1 апрелдан бошлаб 1-, 2-, 3-, 4-, 5-, 9-, 11- синф ўқувчилари мактабга қайтади. 6-, 7-, 8-, 10-синфлар он-лайн режимида ўқишда давом этади.
Қирғизистонда 29 март куни Хитойда ишлаб чиқарилган Sinopharm вакцинаси билан эмлашнинг биринчи босқичи бошланди.
Яқинда республикага ушбу вакцинанинг 75 минг кишига мўлжалланган 150 минг дозаси олиб келинганди. Шунингдек, мамлакатга Россиядан 500 минг доза «Спутник V» вакцинаси олиб келиниши кутилмоқда.