Туркиянинг Кўня шаҳрида 2,5 ойлик кузатувдан сўнг ўлим таҳдиди билан 12 нафар аёлни жинсий қулликда сақлаб келган гуруҳ қўлга олинган. Hürriyet нашри хабарига кўра, фаҳш ишларга мажбурланган аёлларнинг бири Туркия, қолган 11 нафари эса ўзбекистон ватандоши.
Қайд этилишича, амалиёт чоғида ёшлари 29-41 орасида бўлган туркиялик тўрт эркак ва 24 яшар Шаҳноза И. исмли ўзбекистонлик аёл гумонланувчи сифатида тутиб кетилган.
Кузатувдаги манзилларда ўтказилган тинтувлар чоғида 2 та тўппонча ва бир миқдор наркотик моддаси топилган.
Жинсий қулликда тутилган аёллар полиция идорасида берган кўрсатмаларида фоҳишаликдан бош тортган тақдирларида, ўлдирилиш билан қўрқитилганларини билдирганлар.
Айтилишича, Шаҳноза И. ўзига юртдош бўлган аёлларни иш топиб бериш ваъдаси билан Туркияга олиб келиб, қарздор қилиб қўйганидан кейин уларнинг паспортларини тортиб олган.
Хорижлик аёллар, маълумотларга кўра, Кўня вилоят миграция идорасига (İl Göç İdaresi) топширилган. Гумонланувчилар эса “фаҳшга ташвиқ”, “воситачилик”, “жинсий тажовуз”, “таҳдид” ва “гиёҳванд модда истеъмоли” моддаларида айбланиб, ҳибсга олинганлар.
