Фото: «News.yandex.ru» Биринчи марта Буюк Британияда аниқланган коронавирус янги штамми яна бир қитъага етиб борди. Канадада иккита касалланиш ҳолати қайд этилди. Бу ҳақда Онтарио провинцияси сайтида хабар берилган. Вирусни юқтирилганлар — Дарем муниципалитети истиқомат қилувчи эр-хотин. Улар саёҳатга чиқишмаган, юқтириш хавфи ҳам юқори бўлмаган. Ҳозирда улар ўзларини изоляцияга олишган. 26 декабрь ярим тунидан бошлаб провинцияда қаттиқ чеклов чоралари жорий этилган. Онтарио COVID-19ни юқтириш бўйича Квебекдан кейин иккинчи ўринда туради. 26 декабрда Франция ва Испанияда янги штамм аниқланди. Бир кун олдин, худди шундай штамм Ирландия ва Японияда, 24 декабрда эса Германияда қайд этилганди. Коронавируснинг хавфли мутацияси Буюк Британияда аниқланди. Бугунги кунга келиб мингга яқин янги штамм билан касалланиш ҳолати қайд этилди. Мутация, шунингдек, Дания, Бельгия, Нидерландия, Австралия, Жанубий Африкадаги беморларда ҳам кузатилган. Британиялик мутахассислар коронавируснинг ушбу тури тезроқ тарқалаётганини маълум қилди. 20 дан ортиқ мамлакат Буюк Британия билан транспорт алоқалари тўхтатилишини эълон қилди.
