Ҳоким ўз мурожаатида 2020 йил учун белгилаб олинган вазифалар, ижро натижаси, эришилган ютуқлар, шунингдек, 2021 йилга белгиланган устувор йўналиш ва вазифалар ҳақида айтиб ўтди.
Бугун Халқ депутатлари Тошкент шаҳар Кенгашининг йигирма тўққизинчи сессияси бўлиб ўтди.
Кенгайтирилган йиғилишда Тошкент шаҳар ҳокимининг мурожаати ҳам тингланди.
Uznews.uz мухбирининг хабар беришича, унда 2020 йил учун белгилаб олинган вазифалар, ижро натижаси, эришилган ютуқлар, шунингдек, келгуси йилга белгиланган устувор йўналиш ва вазифалар айтиб ўтилди.
Жумладан, Жаҳонгир Ортиқхўжаев жорий йилги инвестиция дастурига мувофиқ жами 1 млрд496 млндоллар шундан, 1 млрд190 млндоллар тўғридан-тўғри хорижий инвестициялар ва кредитлар ўзлаштирилганлигини қайд этди. Шунингдек, 8 минг 444 та хонадондан иборат 125 та кўп қаватли уйлар қуриб битказилиб, фойдаланишга топширилганлигини маълум қилди.
2021 йилга режалаштирилган бунёдкорлик ишлари, иқтисодиёт тармоқларини ривожлантириш ҳамда ижтимоий йўналишларда амалга оширилиши кўзда тутилаётган муҳим вазифалар, ишлаб чиқилаётган йирик лойиҳаларга тўхталиб ўтилди.
Жумладан, келгусида Қорасув каналининг Мирзо Улуғбек, Яшнобод ва Миробод туманлари ҳудудидан оқиб ўтувчи жами 4,9 километрида бошланган ободонлаштириш ва сайилгоҳ ташкил этиш ишлари ниҳоясига етказилади. Қорақамиш коллекторининг Юнусобод тумани ҳудудидан оқиб ўтувчи 1,2 километр, Анҳор каналининг Чилонзор тумани ҳудудидан оқиб ўтувчи 1,7 километр қисмида сайилгоҳлар ташкил қилиш, Жўн каналининг Сергели тумани ҳудудидан оқиб ўтувчи 2 километрида қирғоқ ва ўзанларни мустаҳкамлаш ишлари якунига етказилади.
Шу билан бирга, Ислом цвилизацияси маркази, Сергели йўналишидаги ерусти метросининг 6 та бекати ва Сергели туманидаги йўл ўтказгич каби бир қатор лойиҳаларни тугаллаш ҳамда Аҳмад Дониш кўчасини тўлиқ қайта таъмирлаш ишларини олиб бориш режалаштирилмоқда.
