Ўзбекистон президенти Шавкат Мирзиёев раислигида 18 декабрь куни Мустақил Давлатлар Ҳамдўстлиги Давлат раҳбарлари кенгашининг видеоанжуман шаклидаги мажлиси бўлиб ўтади. Бу ҳақда президент матбуот хизмати маълумот тарқатди.
Қайд этилишича, саммит кун тартибидан МДҲ доирасидаги сиёсий, савдо-иқтисодий ва маданий-гуманитар ҳамкорликнинг барча йўналишларида, шунингдек, янги хатар ва таҳдидларга қарши биргаликда курашиш соҳасида кўп қиррали муносабатларнинг бугунги ҳолати ва уларни ривожлантириш истиқболларини баҳолаш масалалари ўрин олган.
Мажлисда делегациялар раҳбарлари МДҲни 2030 йилгача бўлган муддатда янада ривожлантириш концепцияси лойиҳасини ва уни амалга ошириш режасини кўриб чиқишлари кутилмоқда. Ушбу ҳужжатларда ҳамкорликнинг яқин ва ўрта муддатли истиқболдаги стратегик мақсадлари ва асосий тадбирлари белгиланган.
“Учрашув якунида Бирлашган Миллатлар Ташкилотига асос солинганининг 75 йиллиги муносабати билан ҳамда халқаро ахборот хавфсизлигини таъминлаш соҳасида ҳамкорлик тўғрисидаги қўшма баёнотлар, шунингдек, Ҳамдўстлик фаолиятининг турли жиҳатларига доир, шу жумладан, 2021 йилда Давлат раҳбарлари кенгашининг навбатдаги мажлиси ўтказиш жойи тўғрисидаги қарорлар қабул қилиниши режалаштирилган”, дейилган хабарномада.
Ўзбекистон бу йил МДҲга раислик қилмоқда. Маълумотларга кўра, жорий йилда ташкилот фаолияти билан боғлиқ 60 га яқин кўп томонлама тадбир ўтказилган, МДҲни янада ривожлантириш ва мустаҳкамлаш бўйича 70 дан зиёд ҳужжат қабул қилинган.
1991 йил декабрида асос солинган МДҲ таркибига Арманистон, Беларусь, Молдова, Озарбайжон, Россия, Тожикистон, Ўзбекистон, Қирғизистон ва Қозоғистон каби давлатлар киради.
