Марокаш ва Исроил расмийлари дипломатик алоқаларни нормаллаштириш тўғрисида келишувга эришишди. Бу ҳақда 10 декабрь куни АҚШ президенти Дональд Трамп эълон қилди.
Шу тариқа Марокаш сўнгги ойларда яҳудий давлатини тан олишга рози бўлган тўртинчи араб мамлакатига айланди.
“Яна бир тарихий кун! Бизнинг иккита катта дўстимиз – Исроил ва Марокаш қироллиги тўлиқ дипломатик алоқаларни ўрнатишга розилик беришди – бу Яқин Шарқда тинчлик ўрнаши йўлида улкан муваффақият!” деб ёзди Трамп Твиттердаги ўз саҳифасида.
Келишув Работ ва Тел-Авивда тезлик билан алоқалар бўйича офислар очишни (кейинчалик элчихоналар фаолиятини йўлга қўйиш шарти билан) ўз ичига олади. Икки мамлакат авиаширкатлари учоқлари ҳаво ҳудудидан биргаликда фойдаланиш ҳуқуқини қўлга киритади.
Аввалроқ Исроил Қўшма Штатлар воситачилигида Бирлашган Араб Амирликлари, Судан ва Баҳрайн билан шу каби шартномалар тузганди. Бу шартномалар билан араб дунёси давлатлари сўнгги 25 йил ичида илк бор Исроилни тан олишди.
Исроил ва араб мамлакатлари ўртасидаги музокараларда фаол иштирок этаётган Жаред Кушнер (АҚШ президенти Дональд Трампнинг маслаҳатчиси ва куёви) пайшанба куни Исроил билан Саудия Арабистони ўртасидаги алоқаларнинг нормаллашиши эртами-кечми содир бўлиши муқаррар ҳодиса эканини қайд этди.
