Кеча, АОКАда ўтказилган матбуот анжуманида Монополияга қарши курашиш қўмитаси раисининг биринчи ўринбосари Бобир Каримов қўмита МСКТ таҳлили учун нарх сунъий оширилганини текшириш мақсадида Тадбиркорлик ҳуқуқини ҳимоя қилиш бўйича Бизнес-омбудсманга мурожаат қилингани, аммо Бизнес-омбудсман текшириб ҳам ўтирмай, бу масалада қонунбузилиш ҳолати йўқ, деган хулоса берганлиги ва текширишни рад этганлигини айтганди.
Ҳолат бўйича Бизнес-омбудсман раддия билдирди.
Раддияда маълум қилинишича, Президентнинг 2018 йил 27 июлдаги "Тадбиркорлик субъектларининг ҳуқуқлари ва қонуний манфаатларини ҳимоя қилиш тизимини янада такомиллаштириш чора-тадбирлари тўғрисида"ги Фармонининг 2-иловаси 30-бандида Монополияга қарши курашиш қўмитасининг ваколатига кирувчи масалалар бўйича текширувлар Текширувларни электрон рўйхатга олиш ягона тизимида рўйхатдан ўтказиш орқали ваколатли органни хабардор этиш тартибида ўтказиладиган текширувлар рўйхатига киритилган.
Ушбу рўйхатда кўрсатилган текширувларни ўтказишда Бизнес-омбудсманнинг рухсати талаб этилмасдан, балки текширувни электрон тизимдан рўйхатдан ўтказиш орқали Бизнес-омбудсман хабардор этилиши белгиланган.
Шунга қарамасдан, Монополияга қарши курашиш қўмитаси ўзининг 2020 йил 13 октябрдаги 813/02-12-сонли хатида МСКТ хизматлари кўрсатишда нархларнинг кескин ўсиши юзасидан таҳлилларни келтириб, хусусий ва давлат тиббий муассасаларининг айнан ўпканинг мультиспирал компютер томографиясини амалга ошириш билан боғлиқ бўлган хизмати нархларининг шаклланиши юзасидан текшириш ўтказиш мақсадга мувофиқлиги юзасидан хулоса беришни сўраб мурожаат қилган, дейилади раддияда.
Қўмита томонидан Бизнес-омбудсманга МСКТ хизматлари нархлари ошиши ҳолати бўйича тўлиқ таҳлилий маълумот тақдим этилмаганлиги сабабли, текширувларни амалга ошириш мақсадга мувофиқ эмаслиги тўғрисида фикр билдирилган.
Қайд этилишича, бундай текширувларни ўтказиш юзасидан Монополияга қарши курашиш қўмитаси томонидан қонунчиликда белгиланган тартибда буюртма келиб тушмаганлиги ҳамда Бизнес-омбудсман девони томонидан рухсат ёки рад жавоблари берилмаган.
