Беларус Ички ишлар вазирлиги Минск марказига хавфсизликни таъминлаш мақсадида ички қўшинлар ва зирҳли техника киритилганини тасдиқлади.
Беларус пойтахти маркази президент Александр Лукашенкога қарши норозилик намойишларининг асосий ўчоқларидан бири бўлиб қолмоқда.
Хабарларда айтилишича, президент резиденцияси жойлашган Мустақиллик саройига камида 7та БТР жойлаштирилди. БТРларга катта калибрли пулемётлар ўрнатилган.
Бундан ташқари Мустақиллик саройи томида ҳам қуролли ҳарбийлар кузатилган. Уларнинг снайперлар экани тахмин қилинмоқда.
Агентликларнинг билдиришича, 30 август - президент Александр Лукашенконинг туғилган кунида Минск марказий майдонига келган норозилар сони аввалгилардан кўп бўлган. Намойишчилар “Саша, ташқарига чиқ, табриклаймиз”, деб ҳайқиришган.
Лукашенконинг матбуот котиби Наталья Эйсмонт Новости агентлигининг “Президент қаерда?” деган саволига жавобан Лукашенконинг Мустақиллик саройида бронежилет кийиб, автомат кўтарган суратини тақдим этган.
Ички ишлар вазирлиги Минскда ўтган намойишда 130 киши қўлга олинганини билдирди.