Фото: Getty Images Оғир вазн тоифасида WBC вақтинчалик камари соҳиби Александр Поветкин Диллиан Уайтга қарши жангдаги ғалабасидан кейин ўз фикрларини билдириб ўтди. - "Жанг аввалида бироз эҳтиёткорлик қилдим ва бунинг натижасида бир нечта ёқимсиз зарба ўтказиб юбордим. Нокдаунларга келадиган бўлсак, уларни оғир деб атамаган бўлардим. Ҳаммасини тушуниб ва англаб турардим. Бироқ Уайтни алоҳида эътироф этиш керак, унинг зарбаси кучли. Мени ҳисобдан чиқариб қўйганлар адашганини барчага исботладим. Бу ёқимли туйғу ва биз йўлда давом этамиз. Диллиан билан реваншга келадиган бўлсак, агар промоутерлар келиша олса, мен бунга рози бўламан. Уайлдер — Фьюри жуфтлиги ғолиби билан бўладиган жангга қадар ҳали анча бор. Бизнинг шартномада реванш ҳақида банд бор", - дейди Александр Поветкин. Россиялик боксчи 23 август куни бўлиб ўтган бокс кечасида Уайтни 5-раундда нокаутга учратди ва WBC дивизионининг вақтинчалик чемпионига айланди. Эндиликда Поветкин Тайсон Фьюри эгалик қиладиган WBC камари учун мажбурий даъвогар ҳисобланади.
