Европа лигасининг чорак финал «Славия» ва «Челси» учрашуви олдидан лондонлик мухлислар «Ливерпуль» ҳужумчиси Муҳаммад Салоҳни ҳақоратловчи қўшиқ куйлади. Мазкур ҳолат Прагадаги барда юз берган бўлиб, «аристократлар» мухлислари мисрлик футболчини «Салоҳ-террорчи» дея аташган.
Лондон клуби интернетда тарқалган видеони ўрганиб, уч нафар иштирокчининг шахсига аниқлик киритди ва уларни стадионга қўймаслик учун зарурий чораларни кўрди. Муҳаммад Салоҳнинг жамоаси ва «Челси» бўлиб ўтган ишни қуйидагича изоҳлаган:
“«Челси» дискриминациянинг (камситиш) барча шаклларини жирканч ҳисоблайди. Аниқ далилларга эга бўлиб, уларда клубнинг аъзолик абонементлари борлиги аниқланадиган бўлса, биз уларга қарши барча қатъий чораларни кўрамиз. Бундай шахсларнинг борлиги «Челси» мухлислари учун иснотдир. Бундайларга бизнинг сафимизда жой йўқ», – дейилган Лондон клуби мурожаатида.
«Ижтимоий тармоқларда тарқалган видео, бизнинг футболчимизга қаратилган ҳақоратловчи қўшиқларни акс эттиради. Жорий мавсум шунга ўхшаш ҳолатлар кўпайиб кетди. Бундай хатти-ҳаракатлар учун жавоб бериш керак», – дейилган мерсисайдликлар мурожаатида.