Толибон ҳаракати матбуот котиби Забиҳуллоҳ Мужоҳид БМТ Хавфсизлик кенгаши Толибоннинг музокараларда иштирок этаётган аъзоларига қарши санкцияларни вақтинча бекор қилганини маълум қилди.
Афғон исломий матбуоти (АИМ) толиблар орасидаги манбага таянган ҳолда Хавфсизлик кенгаши беш доимий аъзоси иштирокида ўтказилган муҳокамалар ортидан толиблар вакилларига қарши санкцияларни вақтинча бекор қилганини хабар қилди. Агентлик хабарига кўра, санкциялар тўққиз ойлик муддатга бекор қилинган.
Аммо АИМ хабарини мустақил равишда тасдиқлаб бўлмади. БМТ Хавфсизлик кенгаши бу хабарни ҳали изоҳлагани йўқ.
АҚШнинг Афғонистон бўйича махсус вакили Залмай Ҳалилзод билан музокараларда иштирок этаётган 14 нафар толиблар вакилининг аксарига қарши БМТ Хавфсизлик кенгаши санкция жорий қилган. Кейинги ойларда Ҳалилзод Қатарда Афғонистондаги урушга барҳам бериш мақсадида толиблар билан бир неча марта учрашиб, тинчлик музокараларини ўтказди.