Фарғона, Хоразм, Сирдарё, Қашқадарё ва Бухоро вилоятларининг янги логотипини ишлаб чиқиш бўйича кўрик-танлов эълон қилинди.
Туризмни ривожлантириш давлат қўмитасининг билдиришича, ҳар бир вилоят учун ишлаб чиқилган энг яхши логотип муаллифларига 25 миллион сўмдан мукофот пули берилади.
Расмий маълумотда айтилишича, логотип лойиҳалари 11 апрелдан 30 майгача қабул қилинади. Танловда ёши 16 ва ундан катта бўлган талабалар, тарихчилар, дизайнерлар ва фуқаролигидан қатъиназар бошқа одамлар қатнашиши мумкин.
«Правда Востока» газетаси Туризмни ривожлантириш давлат қўмитасининг бу ташаббусига кинояли муносабат билдирди.
«Давлат қўмитаси меҳмонлар оқимини жойлаштириш, ташиш ва шу каби бошқа аспектлардаги муаммоларни бартараф этиб бўлибди-да, деб жиддий ўйланиб қолиш мумкин.Энди фақат логотипларни тарқатиб қўйишгина қолибди-да», - деб ёзди нашр.
Февраль ойининг охирларида Тошкент шаҳар кенгаши пойтахт логотипини тасдиқлаган эди.