Advokat Nikolay Polozov Rusiyeniñ Ermeni Bazar şeer mahkemesiniñ qırımtatar halqınıñ milliy lideri Mustafa Cemilevge çıqarılğan ükümni temyiz etecek ola. Bunı o öz Telegram kanalında haber etti.
"Munaqaşa vaqtında mudafaa tarafı Mustafa Cemilevniñ bütün maddelerge köre aqlanmasını talap etti", - depâ yazdı advokat.
Polozovnıñ sözlerine köre, mudafaa tarafı dava bütünley "daa mahkeme tahqiqatı vaqtında dağılğanını" defalarca qayd etken edi.
"Mahkeme devlet qabaatlayıcınıñ talaplarını qanaatlendirmekten red etti. Mahkeme statistikası nazik bir şey olğanını añlamaq müimdir, aqlama ükümler içün ise mahkemecilerni cezalaylar. Şunıñ içün çoqusı allarda, qabaatnı isbatlağan deliller olmağanda mahkemeler qabaatlav ükümler çıqara, amma mahkemelengenni cezadan azat ete", - dep haber etti o.
Aprelniñ 22-nde Rusiyeniñ nezaretinde olğan Ermeni Bazar şeer mahkemesi qırımtatar haqlınıñ milliy lideri Mustafa Cemilevge ğıyaben üküm çıqardı. O qabaatlı tanıldı, amma aqlama etilmegen esaslarğa köre azat etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
