Herson vilâyetiniñ işğal etilgen topraqlarında ve işğal etilgen Qırımda Rusiye ordusı yerli iş adamlarını qırsızlay, qorquta ve Rusiye ordusı ile işbirlik etmege mecbur ete, dep haber ete "QırımSOS" teşkilâtı.
Rusiye askerleri silânen kelip yerli ealiden ve iş adamlarından yük maşnalarını ve yolcu naqliyatını tutıp alalar. Bundan ğayrı yerli logistik şirketleriniñ reberleriñ ve saipleriniñ yanına kelip, emirlerini yerine ketirmege mecbur eteler.
"Adamlarnı şantaj eteler, olarnı öldürüv ve tuvğanlarını iskencelerge oğratuv ile tehdit eteler. Olarnı işğal etilgen Qırımğa ve Rusiye Federatsiyasına qatnamağa ve hızmet etmege mecburlaylar. İhtimal ki, böyle etip yerli mallar ya da qırsızlanğan şeyler çıqarıla ve Herson vilâyetine keyfiyeti yaramay olğan Rusiye mahsulları ketirile. Qırımda işğalciler yerli iş adamlarına kelip, Herson ile ticaret etmege mecbur eteler. İş adamları red etseler, olarnı qorqutalar", - dedi "QırımSOS" idaresiniñ reisi Denis Savçenko.
Bunı tasdıqlağan mustaqil malümat şimdilik yoq.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
