Qırımtatar siyasetçisi ve faali Nariman Celâl ve faaller Aziz ve Asan Ahtemovlar mabüsleri olğan Anğara köyündeki «gaz borusında diversiya» davası Rusiye kontrolindeki Qırım Yuqarı mahkemesine keldi. Bu aqta advokat Nikolay Polozov bildirdi.
Onıñ malümatına köre, ilk diñlevler fevralniñ 18-ne belgilendi.
«Bu davada quvetçiler soñki yıllarnıñ bütün «tecribesini» qullandı. Elektrik aqımınen işkence, gizli şaatlar, qapalı mahkemeler, sıñırlav tedbirleri ve bir çoq diger tedbirler meselelerinen bağlı mahkemeler», – dep qayd etti uquqçı.
Polozov, qabaatlanğan Celâl ve Ahtemovlar 20 yılğa qadar apiske alına bile, dep hatırlattı. O, iç birisi «sahte cinaiy davada» qabaatını tanımay, dep ayttı.
2021 senesi dekabrniñ 15-nde advokat Nikolay Polozovnıñ bildirgenine köre, Rusiye quvetçileri Anğara köyündeki «gaz borusında diversiya» davası boyunca ilk tahqiqatnı yekünledi, Nariman Celâlğa daa bir qabaatlav berildi.
Qırımtatar siyasetçisi ve faali Nariman Celâl işğal altındaki Qırımda tahqiqat ve adliyeni «yalancı» ve «sımarlanğan» dep adlandırdı.
Yanvarniñ 25-nde Rusiye kontrolindeki Qırım Yuqarı mahkemesi Nariman Celâl, Asan ve Aziz Ahtemovlarnıñ apiske alınmasına qarşı imayeniñ istinaf şikâyetini red etti. Olar eñ az fevralniñ 23-ne qadar SİZOda qalacaq.
Advokat Nikolay Polozov Nariman Celâl «tış dünyadan ciddiy bir izolâtsiyada» tutula, dep qayd etken edi.
