Kyivde yanvarniñ 23-nde Ukraina Milliy sanat müzeyinde Ukraina içtimaiy adalet halqara fondu (IOSJ Ukraine) ve «Qırım evi» Devlet müessisesiniñ iştiraki ile qırımtatar tilinde birinci müzey ses qılavuzı taqdim etildi.
Taqdim merasiminde Ukraina prezidentiniñ vekili Anton Korınevıç, Qırımtatar halqınıñ lideri, Ukraina halq deputatı Mustafa Cemilev ve Qırımtatar Milliy Meclisiniñ reisi Refat Çubarov iştirak ettiler.
«Tamır qırımtatar halqı mirasınıñ inkişafınen bağlı er şey bizim içün prioritet ola: til, edebiyat, medeniyet, ananeler. Qırımtatar tilinde bu ses qılavuzı bu müzeyniñ pek müim şeyi olacaq, em tamır halqnıñ vekilleri faydalanacaq, em türk tillerinde laf etken halqlar Ukraina ve Qırım aqqında daa çoq bilecek», – dep ayttı Korınevıç.
«Qırım eviniñ» baş müdiri Ahtem Seitablayev, «Qırım ailesi» cemaat teşkilâtınıñ reisi Anife Kurtseitova, Qırımtatar Milliy Meclisiniñ azası Gayana Yüksel, oyuncı ve jurnalist Elvina Zeynedinova, qırımtatar filologı Mamure Çabanova, alıp barıcı ve filolog Alina Bondarenko ve belli qırımtatar teatr ve kino yuncıları seslerini ses qılavuzı içün ediye etti.
Hatırlatamız, dekabrniñ 15-nde «Ukrinformnıñ» matbuat merkezinde balalar içün «BÜLBÜL» qırımtatar tilini ögrenüv platforması taqdim etildi.
Bundan evel Ukraina Nazirler şurası latin urufatı esasında qırımtatar tiliniñ elifbesini tasdıqladı.
Ukraina Nazirler şurası aprelniñ 7-nde qırımtatar tiliniñ inkişaf kontseptsiyasını tasdıqladı.
