Amerika Birleşken Devletleri Rusiyeniñ Ukrainağa ücüm etüv telükesi sebebinden kelecek afta Kyivdeki elçihane hadimleriniñ bir qısmını tahliye etip başlay bile, dep haber ete CNN Amerika telekanalı.
ABD Ukraina elçihanesi bu malümatnı şimdilik tefsir etmey.
Telekanalnıñ menbaları bildirgenine köre, elçihane Devlet departamentine muracaat etip, diplomatlarnıñ qorantalarına ve ekinci derece hadimlerine Ukrainanıñ paytahtını terk etmelerine izin bermege rica etti. Kyivdeki diplomatik missiyanıñ bir qısmını tahliye etüvni bu afta devlet kâtibi Antony Blinken ve Ukraina prezidenti Volodımır Zelenskıy muzakere ettiler.
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr etip, ABD ve NATOdan telükesizlik kefaletlerini talap etti – hususan NATOnı şarqqa kenişletmemek. Ğarp vekilleri printsipial meselelerde uzlaşuv olmaycaq, dep bilrdirgen edi.
