Amsterdamnıñ İstinaf mahkemesi oktâbrniñ 26-nda Ukrainağa daa yarımada işğalinden evel Qırım müzeyinden çıqarılğan ve alâ daa Ukrainağa qaytarılmağan eksponatlarnı – «skit altınlarını» bermege qarar aldı, dep haber ete Azatlıq Radiosı.
Davada Felemenk Qırallığında bulunğan Ukraina müzey fondunıñ 565-ten çoq eşyası aqqında aytıla. Esasen bu arheologik tapılmalar, kollektsiyanıñ fiyatı tahminen 10 million euro ola.
Aprel ayında Ukraina istinaf mahkemesiniñ oturışuvı vaqtında tecavuzcı devletke Ukrainanıñ medeniy mirasını berip, 1970 senesiniñ UNESCO Şartnamesini bozmamağa çañırdı.
2016 senesi dekabr ayında Amsterdamnıñ Bölge mahkemesi Qırım müzeyleriniñ eksponatlarını Ukrainağa qaytarmağa qarar berdi. 2017 senesi baarde Rusiye bu qararğa itiraz bildirdi.
2019 senesi martnıñ 11-nde bu dava Amsterdamnıñ İstinaf mahkemesinde diñlenmege başladı.
500-den ziyade müzey eşyasından ibaret «Qırım: altın ve Qara deñizniñ sırları» sergisi 2014 senesi yanvarniñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi fevralniñ 7-nden avgustnıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi. Ukraina akimiyeti artefaktlar müzeylerniñ mülki degil, Ukraina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
