Yaltada selden soñ yaralanğanlarnıñ sayısı 48-den 54-ke arttı. Bir insan elâk oldı, bir qadın ğayıp oldı.
Bu aqta iyünniñ 22-nde Moskva kontrolindeki Yalta memuriyetiniñ yolbaşçısı Yanina Pavlenko fevqulâde vaziyetni yoq etüv operativ ştabınıñ toplaşuvında ayttı.
«Şimdige qadar 54 yaralanğan kişi tibbiy yardım içün muracaat etti, 6 kişi hastahanege alındı, 48 insanğa ambulator yardım kösterildi – sağlıq içün ciddiy telükeler yoq», – dep ayttı Pavlenko.
Yaltada ve şarqiy Qırımda keçken afta Qırımda olğan furtuna aqibetlerinen küreşmege devam eteler. Qırımnıñ Rusiye yolbaşçısı Sergey Aksenov salı ve çarşenbe Yaltada raatlıq künleri olacaq, dep bildirdi.
Akimiyet Qırımnıñ yedek fondundan 161 mln 160 biñ ruble yarımadadaki fevqulâde vaziyet aqibetlerini yoq etmek içün sarf etmege qarar berdi.
İyünniñ 22-nde Qırımda bazı yerlerde pek küçlü yağmur, boranlı yağmur, burçaq yağması beklenile, yel süratı saniyede 15-20 metr esecek.
