Ukrainanıñ teşebbüsinen fevralnıñ 23-nde Donbasnıñ işğal etilgen topraqlarındaki ve ilhaq etilgen Qırımdaki vaziyet boyunca BMT Baş Assambleyasınıñ toplaşuvı ötkerilncek. Bunı LB.ua-ge BMT yanında Ukrainanıñ daimiy temsilcisi Sergiy Kıslıtsâ bildirdi.
Onıñ aytqanına köre, kün tertibiniñ suallerinden biri Donbas aqqında maruzanıñ muzakere etilmesi olacaq. Ukraina qanunsız sürette teşkil etilgen “Rusiye Donbası” Rusiye forumı aqqında meseleni köterecek.
“Fevralnıñ 23-nde Ukrainanıñ daimiy temsilciligi vaqtınca işğal etilgen topraqlarnıñ meseleleri boyunca Nazirliginiñ reberliginiñ reisiligi altında bütün BMT azaları içün brifing teşkil etecek. Anda vaqıt müddeti olmadan cebedeki adiselerniñ ketişatı aqqında er şeyni aytıp olacaqmız”, – haber etti o.
Keçenlerde, Ukraina TİN, fevralnıñ 17-nde Qırımda olıp keçken ve tevqifler ile yekünlegen kütliy tintüvler ve yaqalavlar aqqında malümatnı BMT Baş Assambleyasınıñ baqıluvına çıqaracaq ola, dep bildirdi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
