Rusiye baş nazir muavini Marat Hunsullin, Aqyar tezden tamamınen suv ile temin etilecek, dep bildirdi.
Onıñ fikrince, şeerni suv ile temin etmege Kadık ocağından ve Belbek özeninden suv arqtarılması yardım etken.
“Valige (Aqyarnıñ Rusiye başı Mihail Razvojayev – QA) yahşı iş, tez ve doğru qararar içün minnetdarlıq bildirem. İşler planğa köre yapıla, qoşma çoqraqlar tapılğan, şunıñ içün Aqyar tezden tamamınen suv ile temin etilecegine inanamız”, – yazdı Hunsullin öz Instagram saifesinde.
2020 senesi dekabrniñ 19-nda Aqyar Mavı gölden suvnen temin etilip başlandı. Rusiye nezaretinde olğan şeer başı Mihail Razvojayev, bunıñ sayesinde Aqyarda suv cedvelleri tayin etilmeycek, dep bildirdi. Onıñ aytqanına köre,eali içün suv berilüvi 2021 senesi mart ayınace sıñırlanmaycaq.
Kadıkov ocağındaki gölden Aqyarğa suv bermek içün Rusiye arbiyleri “Zolotaya Balka” işhaneniñ yüzüm bağlarından borular çekti.
Yerli Rusiye akimiyetniñ malümatına köre, bu leyhanıñ fiyatı –350 million ruble teşkil etken.
2000-ncı yılnıñ başında Kadık ocağı qapatılğan edi. Bundan soñ ocaqnıñ çuqurında tatlı suvlu göl peyda oldı. O Aqyarnıñ eñ aşağı noqtasıdır – deñizniñ seviyesinden 14 metr aşağı.
Mavı gölde suvnıñ kölemi 2020 yılnıñ sentâbr ayınıñ soñuna 4,5 million kub metr edi.
Qırım ve Aqyarda suv qıtlığını yoq etmek içün keñiş bir programma oktâbrniñ 8-nde qomşu Rusiyede ükümetniñ oturışında tasdıqlandı. 2020 senesi noyabr ayında Rusiyeniñ Mudafaa nazirligi, şeerni suvnen temin etmek içün arbiyler Kadık ocağında tulumba stantsiyasını tesbit etecekler, dep bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
