Rusiye kontrolindeki Bağçasaray rayon mahkemesi Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ anası Venera Mustafayevanı memuriy mesüliyetke çeküv protokollarını Bağçasaray rayonınıñ politsiya bölügine qaytardı.
Bu aqta «Qırım birdemligi» cemaat birleşmesiniñ advokat Lilâ Gemeciniñ aytqanlarına esaslanıp bildire.
«Protokollar memuriy qanunlarnıñ normalarına zıt bir şekilde tizildi. Venera Mustafayevağa aqları, mecburiyetleri añlatılmadı. Memuriy cinayet protokolı tizilgende olğan terciman mesüliyet aqqında ihtar etilmedi. Mahkemeniñ dava malümatlarını politsiyağa qaytarmasınıñ sebebi de bu», – dep tarif etti Gemeci.
Onıñ aytqanına köre, Bağçasaray rayonı mahkemesiniñ qadısı Vasiliy Koşelev Rusiye Memuriy cinayetler kodeksiniñ eki maddesi boyunca eki tarif berdi.
«Memuriy dava açılğan şahısnıñ aqları bozulğanı içün mahkeme bunı ciddiy ve tahqiqat ketişatında tüzelmeycek dep tanıy, şunıñ içün memuriy bozuv protokolını ve diger malümatnı olarnı tizgen organğa qaytarmaq kerek degen hulâsa çıqaram», – dep aytıla «Qırım birdemliginiñ» eline keçken kopiyalarda.
Mahküm etilgen «Qırım birdemligi» koordinatorı Server Mustafayevniñ anasını 17 insan qorumağa keldi. Olarnıñ arasında – 6 advokat ve 11 cemaat imayecisi.
Sentâbrniñ 15-nde – oğlunıñ ükmü çıqarılğan künü – Venera Mustafayeva Bağçasarayda bir kişilik narazılıq aktsiyasına çıqtı. Qollarında yazuvlı şiar bar edi: «Camideki subetler – cinayet degildir! Oğlumnı qaytarıñız!».
Dava Rusiye Memuriy cinayetler kodeksiniñ 20.6.1 maddesine istinaden (Fevqulâde vaziyet ola bilecek yerde yüksek seviyeli azırlıq rejimi alda qaidelerge riayet etmeme) ve Rusiye Memuriy cinayetler kodeksiniñ 20.2.2 maddesine istinaden (Açıq tedbir keçirilecegine dair haber etmeyip, açıq tedbirni teşkil etüv ya da ötkerüv) açıldı. Birinci madde boyunca 1 biñden 30 biñ rublege qadar para cezası ya da ihtar ola bile. Ekinci madde 20 biñden 30 biñ rublege qadar para cezası ya da 50 saatqa qadar mecburiy işler, ya da 10 künlik memuriy apis cezası berilmesini belgilemekte.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi Server Mustafayevni «Hizb ut-Tahrir davası» boyunca 14 yıl sert rejimli koloniyada qalmasına üküm etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
