İlhaq etilgen Qırımdan Ukrainanıñ qıtasına kelgen çetel vatandaşları alâ daa özüni izolâtsiya etmeli ve sigortaları olmalı. Bunı QMC-nde Ukraina prezidentiniñ Temsilciligi bildire.
"Adamlar "qırmızı mıntaqa"dan kelse, "Evde areket et" ("Diy vdoma") qullanımı ile karantin olar içün vaciptir. Amma tranzit yapqanlar içün istisna bar", - denile beyanatta.
Qırımnıñ Rusiye akimiyeti iyülniñ 15-nden itibaren yarımadağa esas Ukrainadan ve çetelden kelgen vatandaşlar içün mecburiy observatsiyanı lâğu ete.
Daa evel «Çonğar», «Kalançak» ve «Çaplınka» keçiş noqtalarından Qırımğa kirgen bütün vatandaşlar eki afta mecburiy observatsiyada qalmaq kerek edi.
Hatırlatamız, 2020 senesi martnıñ 29-ndan itibaren qomşu Rusiye ükümeti Rusiye vatandaşlığından ğayrı daa bir vatandaşlığı olğan insanlarğa Rusiyeni ve işğal etilgen Qırımnı tek bir kere terk etmege izin bergen edi. Ukraina aq qorçalayıcıları Ukraina Tış işler nazirini bu sıñırlavlarğa cevap bermesine çağırğan edi.
Ukraina Nazirler şurası, COVID-19 testi negativ çıqqan işğal etilgen Qırımnıñ mezunlarına ve çetel vatandaşlarına memleketniñ esas qısmına observatsiyasız kirmege izin bergen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
