Rusiyede üç kün devamında eksilgen koronavirus hastalarınıñ sayısı eki künden berli arta, dep köstere resmiy statistika.
Mayısnıñ 29-nda memlekette 8952 koronavirus hastası qayd etildi, 8212 kişi tüzeldi, 181 insan vefat etti, dep haber ete Azatlıq Radiosı.
Qırğınlıq başlağanından berli memlekette, resmiy malümatqa köre, 396575 insan hastalandı. Şimdi 224551 insan hasta. 167469 insan tüzeldi. 4555 kişi vefat etti.
Hatırlatamız, mayısnıñ 28-nde Rusiyede 232 insan koronavirustan vefat etti – pandemiya vaqtında memlekette vefat etkenlerniñ eñ büyük sayısı.
Johns Hopkins Universitetiniñ malümatına köre, dünyada 5813919 COVID-19 hastası bar (bir künde 118764 hasta qayd etildi), 2,4 mln insan tüzeldi.
Koronavirus hastalarınıñ sayısına köre Rusiye dünyada üçünci yerde qala. Ekinci yerde Braziliya (438,2 biñ, soñki künde 26,4 biñ qayd etildi), birinci yerde ABD (1,72 mln, 22,5 biñ qayd etildi) buluna.
Dünyada koronavirustan ölgenlerniñ sayısı 360 332 insan oldı, bir künde 4 644 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
