BBC: Eýranda ýetginjekleriň harby toparlara goşulýandygy aýdylýar
Eýranda 12 ýaşan we ondan ýokary ýaşly ýetginjekler howpsuzlygy üpjün etmek bilen bagly gurluşlara alynýar diýip, BBC habar berýär. Bu habaryň fonunda, Tährana urlan howa zarbasynda bir 11 ýaşly oglanyň ölmegi halkara jemgyýetçiliginiň ünsüni çekdi.
Ýerli metbugatyň habaryna görä, Alireza Jafari 11-nji martda, kakasy bilen gözegçilik nokadynda bolan wagtynda, çen bilen, Ysraýylyň pilotsyz uçarynyň pidasy boldy.
Pidanyň ejesi Sadaf Monfared oglunyň kakasy bilen paýtagtyň köçelerinde “Basij” meýletinçi milisiýasynyň alyp barýan gözegçilik işlerine kömek edendigini aýtdy. Onuň sözlerine görä, gözegçilik nokadynda adam ýetmezçilik edensoň, kakasy ogluny ýanyna alypdyr we ol "geljekki günlere taýýar bolmaly" diýip pikir edipdir.
Şu aralykda, Yslam rewolýusiýasynyň goragçylary korpusy 12 we ondan uly ýaly ýetginjekleriň harby gulluga çekilmegine mümkinçilik berýän maksatnamanyň, "Eýran üçin Watan Goragçylary" programmasynyň işe başlandygyny yglan etdi.
Guramanyň wekilleri kämillik ýaşyna ýetmedik ýetginjekleriň patrul gulluklaryna we gözegçilik nokatlaryna iberiljekdigini aýtdylar.
Tährandaky, Karajdaky we Reştdäki şaýatlar ýollarda we beýleki gözegçilik nokatlarynda eýýäm ýaragly ýetginjekleri görendiklerini aýdýarlar. Olaryň ýüzleriniň köplenç maskaly bolýandygy aýdylýar.