Türkmenistanda ilatyň Täze ýyl baýramyny şowhunly bellemezligi we köpçülikleýin üýşmeleňleriň döremezligi üçin häkimiýetler tarapyndan çäre görülýän wagtynda ýaşlar döwlet tarapyndan guramalaşdyrylýan köpçülikleýin çärelere gatnaşmaga mejbur edilýär.
Paýtagtyň ýokary okuw jaýlarynyň studentlerine Aşgabatda Täze ýyl baýramy sebäpli planlaşdyrylan konsertleriň ençemesine gatnaşmak tabşyryldy.
Aşgabadyn "Watan", "Türkmenistan" we "Diýar" kinokonsert merkezlerinde geçiriljek estrada konsertleriniň biletleri ýokary okuw jaýlaryna paýlandy we studentlerden pul toplanypdyr.
Azatlygyň habarçysynyň paýtagtyň ýokary okuw jaýlarynyň studentlerine we işgärlerine salgylanyp, berýän maglumatyna görä, bir konsert üçin biletiň bahasy 15 manat. (Merkezi Bankyň kursy boýunça 4,2 amerikan dollaryna barabar-red.)
"Her bir studentden mejbury pul toplanyp, okaýan ýerine baglylykda kinokonsert merkezlerine baryp, hökmany tomaşaçy hökmünde gatnaşmak tabşyryldy" diýip, studentleriň biri gürrüň berdi.
Türkmenistanyň okuw jaýlarynda bilim alýan ýaşlar döwlet tarapyndan geçirilýän çärelere gatnaşmaga yzygiderleri mejbur edilýär. Okuwdan kowulmagyň we erbet baha goýulmagynyň töwekgelçiligi astynda türkmen ýaşlary surnukdyryjy köpçülikleýin çärelere gatnaşmaga, konsertler, teatr sahnalary, at çapyşyklar we sport çäreleri ýaly üýşmeleňleriň mejbury tomaşaçylary bolmaga boýun bolmaly bolýarlar.
Azatlyk bilen gürleşen türkmenistanly ýaşlar we olaryň ene-atalary studentleriň biletler üçin pul tabşyryp, maddy zyýan çekýändigini we üstesine olaryň gatnaşmaly bolýan çäreleriň gyzykly däldigini belleýärler.
"Ilat medeniýetden mahrum boldy, başda türkmen kinosyndan, soň hem estrada aýdymçylary hökümetiň köşk aýdymçylaryna öwrülip, il halar aýdymlardan uzaklaşdy. Prezidenti we watany wasp edýän, manysyz goşgulary aýdym edip, halkyň söýgüsini ýitirdi" diýip, Azatlyk bilen pikirini paýlaşan aşgabatly ýaşaýjy gürrüň berdi.
Aşgabatly studentleriň resmiler tarapyndan guramalaşdyrylan medeni çärelere gatnaşmaga mejbur edilmegi paýtagtly ýaşlaryň, şol sanda mekdep okuwçylarynyň baýramçylyk günleri öýerinden çykmagyna çäklendirme girizilýän wagtynda we okuw jaýlarynda baýramçylyk oturylyşyklaryň geçirilmegine gadagançylyk girizilmegine gabat geldi.
Türkmen studentleri tutuş ýylyň dowamynda hem baýramçylyklarda hem-de adaty wagty tomaşaçysy az medeni çärelere öz hasabyna gatnaşyp, hem märeke döretmäge hem-de maddy goşant goşmaga mejbur edilýärler. Şeýle-de, puluny we wagtyny ýitirýän studentlerden baýramçylyk lybasynda bezemen görünmek we şatlyk duýgusyny beýan etmek talap edilýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
