Türkmenistanyň çagalar baglarynda Täze ýyl sowgatlaryna niýetlenip, ene-atalardan pul serişdeleriniň ýygnalyp alynmagy bilen bagly habarlar dowam edýär.
Azatlyk Radiosynyň habarçylary geçen hepdede Mary welaýatynyň Baýramaly, Türkmengala we Ýolöten etraplarynyň çagalar baglarynda ene-atalardan 50 manat möçberinde pul serişdeleriniň ýygnalyp, bu pullaryň diňe ýarysynyň sowgatlara harçlanmagy barada habar berdi.
“Şol habardan soňra, biz hem çagalarymyza berlen sowgatlary barlap gördük, hakykatdan-da süýji-kökeleriň bahalary 20-25 manatdan geçmeýär” diýip, maryly bir ene-ata Azatlyk Radiosynyň habarçysyna gürrüň berýär.
Bu aralykda, Azatlyk Radiosynyň habarçylary maýyplygy bolan çagalaryň hem maýyplyk pullaryndan Täze ýyl sowgatlaryna niýetlenip, tutumlaryň tutulmagy, ýöne bu pullaryň ählisiniň sowgatlara sarp edilmezligi barada habar berýärler.
“Aslynda, maýyp çagalaryň ählisine, orta mekdeplere ýa-da çagalar baglaryna gatnamaga mümkinçilik bolmadyk çagalara-da ýöriteläp, Täze ýyl sowgatlaryny bermeli, şol 20 manatlyk sowgatlary hem berip bilmeýärler” diýip, ýerli ýaşaýjy aýdýar.
Bu aralykda, IMO ulgamynda paýlaşylan bir wideoda bir aýal maşgala bilim we terbiýeçilik edaralary tarapyndan ene-atalardan pul ýygnalmagynyň yz ýany, görnüşinden, çagalara paýlanyp berlen süýji-kökelere baha berýär.
“Bular arzan süýji-kökeler, sowgatlaryň arasynda hatda bir ‘Snickers’ şokolady hem ýok” diýip, aýal maşgala aýdýar.
Ol berlen sowgatlar üçin ene-atalardan 45 manatdan pul serişdeleriniň ýygnalyp alnandygyny aýdýar.
Wideoda görkezilen harytlaryň hatarynda Türkmenistanda öndürilen önümleri-de synlamak bolýar, ýöne daşary ýurtlarda öndürilen harytlar hem bar.
“Sowgatlaryň içinde üýtgeşik zat ýok, Eýranda öndürilen ‘kukuruzlar’, kökeler bar” diýip, aýal maşgala aýdýar.
Ene-atalaryň käbirleri bilim resmilerini özlerinden sowgatlara niýetlenip ýygnalan pullara göz dikmekde aýyplaýarlar.
“Emeldarlar ýygnalan pullaryň tas ýarysyny öz jübülerine salýarlar” diýip, ýerli ýaşaýjylar aýdýar.
Azatlyk Radiosy bu maglumatlary bilim resmilerine tassykladyp bilmeýär.
Bu aralykda, paýtagtdaky habarçylarymyz Aşgabadyň çagalar baglarynda sowgatlara niýetlenip, ene-atalardan 200 manat möçberinde pul serişdeleriniň ýygnalyp alynýandygyny aýdýarlar.
“Maddy ýagdaýy pes hojalyklar bu pullary berip bilmeýär. Pul beren çagalara terbiýeçiler tarapyndan aýratyn göz bilen seredilýär” diýip, aşgabatly ýaşaýjy aýdýar.
Ol käbir hojalyklaryň şeýle möçberlerdäki pullar bilen tas bir aý oňşup bilýändigini aýdýar.
“Köp pul beren hojalyklaryň çagalaryna ir-iýmişlerden köpräk guýup berýärler” diýip, ýerli ýaşaýjy aýdýar.
Prezident Serdar Berdimuhamedow 29-njy dekabrda Aşgabadyň “Älem” medeni-dynç alyş merkezinde oturdylan Baş arçanyň ýanynda guralan Täze ýyl dabaralaryna gatnaşdy.
Şu ýyl ýurduň esasy arçasynyň yşyklary 14-nji dekabrda ýakyldy. Häkimiýetler baýramçylygyň öňüsyrasynda, eýýäm noýabr aýynda, ýokary synp mekdep okuwçylary, talyp ýaşlar bilen gürrüňdeşlikleri geçirip, baýramçylygy bellemegiň düzgünleri bilen tanyş etdiler.
Aşgabatda okuwçylar diňe döwlet guramaçylygynda geçirilýän çärelere gatnaşmaga höweslendirildiler.
Mary welaýatynda talyp ýaşlar bu baýramçylygy özbaşdak bellemezlik barada dilhaty ýazmaga mejbur edildiler.
Bu aralykda, baýramçylygyň fonunda ýurduň bazarlarynda azyk üpjünçiliginiň ýagdaýyna üns çekildi.
Azatlyk Radiosy paýtagt Aşgabadyň çagalar baglarynda ene-atalardan 200 manat möçberinde pul serişdeleriniň ýygnalyp alynmagy boýunça Bilim müdirliginden resmi teswir alyp bilmeýär.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
