12-nji dekabrda bellenip geçilýän Bitaraplyk baýramynyň fonunda şu günler Lebap welaýatynyň administratiw merkezinde howpsuzlyk çäreleri güýçlendirilýär, polisiýa gözegçiligi ýokarlanýar.
Azatlyk Radiosynyň gündogar sebitdäki çeşmeleri, güýçlendirilýän howpsuzlyk çäreleri bilen baglylykda, Milli howpsuzlyk ministrliginiň Lebap welaýat bölüminiň edara binasynyň deňinde pyýadalaryň hereketiniň doly gadagan edilýändigini aýdýarlar.
Bir şäher ýaşaýjysy howpsuzlyk gullugynyň edara binasynyň deňinden geçip barýarka, özüniň polisiýa işgärleri tarapyndan üstüne gygyrylyp ol ýerden çetledilendigini aýdýar.
“Ýoluň ugrunda polisiýa kän, prezident myhmanhanasynyň öňünden, Milli howpsuzlyk ministrliginiň ýerli edara binasynyň deňinden geçip barýarkam: ‘güm bol şu taýdan, göze görünme!” diýip, üstüme gygyryp kowup goýberdiler. Näme sebäpden beýle bolýandygyna düşünip bilmedim” diýip, şäher ýaşaýjysy aýdýar.
“Merkez” etrapçasynyň birnäçe ýaşaýjysy hem howpsuzlyk gullugynyň ýerli edarasynyň gapdalynda, şeýle-de prezident myhmanhanasynyň deňinde gözegçilik çäreleriniň güýçlendirilendigini aýdýarlar.
Azatlyk Radiosynyň Lebap welaýatynyň içeri işler edaralaryndaky çeşmesi sebitde güýçlendirilen howpsuzlyk çäreleriniň Bitaraplyk baýramy bilen baglanyşykly bolandygyny aýtdy.
Şol bir wagtda, Bitarap Türkmenistan we S. A. Nyýazow köçeleriniň her bir çatrygynda polisiýa işgärleriniň sanynyň artdyrylandygyny görmek bolýar.
Şäheriň iň iri parklarynyň biri bolan “Görogly” seýilgähiniň iş wagty hem gysgaldylyp, bu ýerde agşam sagat 20:00-dan soň gezelenç edilmegine rugsat berilmeýär.
Ýerli ýaşaýjylar seýilgähiň iş wagtynyň bir hepde çemesi mundan ozal gysgaldylandygyny aýdýarlar.
“Bitaraplyk baýramynyň bellenilmegine bir hepde galanda, seýilgählerde gezelenç eder ýaly bolmady” diýip, şäher ýaşaýjysy aýdýar.
Ol seýilgähde ýaş jübütleriň gezelençleriniň hem polisiýa işgärleri tarapyndan çäklendirilýändigini aýdýar.
“Men halaşýanym bilen seýilgähe gezelenje çykypdym, dört sany polisiýa işgäri bizi ol ýerden kowup goýberdi” diýip, ýerli ýaşaýjy sözüniň üstüni ýetirýär.
Şäherde güýçlendirilýän howpsuzlyk çäreleri söwda dükanlarynyň iş tertibine hem täsir edýär.
Bir dükan satyjysy Azatlyk Radiosynyň habarçysy bilen gürrüňdeşlikde baýramçylyk günlerinde özlerine sagat 22:00-a çenli işlemäge rugsat berilýändigini, örän seýrek hem bolsa, käwagt dükanlaryň iş wagtynyň 23:00-a çenli dowam etdirilip bilinýändigini gürrüň berdi.
“Käbir ýerlerde “noçnoý magazinler” [ýagny gijeki dükanlar] bar, polisiýa işgärleri haýsy dükanlaryň gijelerine işleýändigini köplenç bilýärler, ýöne şu günler, nämedir bir sebäpden, olara garşy hem reýdler geçirilýär” diýip, dükan satyjylary aýdýar.
Türkmenistanda 12-nji dekabrda Halkara Bitaraplyk güni dabara bilen bellenip geçilýär. Döwlet mediasy bu baýramçylygy ýurduň daşary syýasatynda gazanylan iň uly üstünlikleriniň biri hökmünde wagyz edýär.
Ýurduň hemişelik bitaraplyk statusy 1995-nji ýylda Birleşen Milletler Guramasy tarapyndan ykrar edildi. Munuň yz ýany, Türkmenistanyň bitaraplygy hakynda ýörite kanun kabul edildi. Bu syýasatya laýyklykda, Türkmenistan harby bileleşiklere, soýuzlara gatnaşmaýar we özüne garşy harby agressiýa amala aşyrylan halatynda beýleki döwletlere, ýa-da Birleşen Milletler Guramasyna ýüz tutmaga haklydyr.
Şeýle-de, Türkmenistan bitaraplyk statusynyň talaplaryna laýyklykda urşa we harby dawalara başlamazlygy borç edinýär we öz çäginde daşary ýurt harby bazalaryny ýerleşdirmeýär.
Şu ýyl Türkmenistanda bitaraplygyň 29 ýyllygy bellenip geçilýär. Bu mynasybetli döwlet gözegçiliginde forumlar we baýramçylyk çäreleri guramalaşdyrylýar.
Synçylar türkmen häkimiýetleriniň bitaraplyk statusyndan üzňeleşmegiň guraly hökmünde peýdalanylýandygyny aýdýarlar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.
