Rus hökümeti 5-nji dekabrda Türkmenistanyň raýatlary elektron wiza alyp, Russiýa syýahat edip bilýän ýurtlaryň sanawyna girizilendigi baradaky karary çap etdi diýip, “Türkmen.news” Russiýanyň premýer-ministri Mihail Mişustiniň gol çeken kararyna salgylanyp ýazýar.
Hökümet web sahypasynda çap edilen habarda tassyklanylmagyna görä, elektron wizany resmileşdirmek dört günden köp wagt almaýar. Şeýle-de, alty ýaşa çenli çagalar wizany mugt alýar.
Türkmenistandaky agyr işsizlik, okuw jaýlaryndaky paranyň möçberi we berilýän bilimiň hiliniň pes bolmagy türkmenistanlylary barha kän daşary ýurtlara çykmaga mejbur edýär.
Aşgabat Ankara bilen gürleşip, Türkiýe bilen aradaky wizasyz gatnaşygy ýatyrtmagy gazananyndan soň, Russiýada ol ýa-da beýleki jenaýatda aýyplanmak we urşa iberilmek howpunyň ýokarlanýandygy baradaky habarlara garamazdan, Russiýanyň Aşgabatdaky ilçihanasynyň öňünde wiza üçin uzyn nobata durýan raýatlaryň barha köpelýändigi, wiza almak bilen bagly korrupsiýanyň ulalýandygy aýdylýar.
