2023-nji ýylda Özbegistanyň agrosenagat toplumynda 600,000 iş orny döredilmeli we eksportyň mukdary 2 milliard dollara ýetirilmeli diýip, prezident Şawkat Mirziýoýewiň ýolbaşçylygynda oba hojalygy barada geçirilen ýygnakda aýdyldy.
Prezidentiň metbugat gullugynyň maglumatyna görä, ýygnakda howanyň üýtgemegi we dünýädäki kyn ýagdaý sebäpli oba hojalyk önümleriniň bahalarynyň ýokarlanmagyna garaşylýandygy bellenildi.
“Biziň oba hojalygyna aýratyn üns bermegimiz we oba hojalyk meselelerini ýygy-ýygydan ara alyp maslahatlaşmagymyz ýöne ýerden däl. Sebäbi ol biziň ykdysadyýetimiziň dörtden bir bölegini düzýär. Halkymyzyň abadançylygy, bahalaryň durnuklylygy, iş orunlary oba hojalygy bilen baglanyşykly "diýip, Şawkat Mirziýoýew aýtdy.
Ýygnakda ýer we suw serişdelerinden tygşytly peýdalanmaga we öndürijiligiň ýokarlandyrylmagyna aýratyn üns berildi, ýurtda gök önümleri we miweleri düýpli gaýtadan işlemegiň görkezijisiniň pes derejede galýandygy bellenildi.
