د طالبانو د اوبو او انرژۍ وزارت: روسي شرکتونه چمتودي چې کابل ته د پنجشنیرله سیند څخه د اوبو د لیږد په پروژه کې برخه واخلي
د طالبانو د اوبو او انرژۍ وزارت وايي چې روسیې د افغانستان د اوبو او انرژۍ په پروژو کې پانګونې ته چمتووالی ښودلی دی.
دې وزارت نن چهارشنبې په یوه بیان کې وویل چې په کابل کې د روسیې سفارت استازو او د دریو معتبرو روسي شرکتونو چارواکو د طالبانو د اوبو او انرژۍ د وزارت له مرستیال عبدالهادي یعقوب سره په کتنه کې د پنجشیرله سیند څخه کابل ته د اوبو د لیږد په پروژه کې د ونډې اخیستو لپاره چمتوالی وښود.
د طالبانو حکومت مخکې ویلي وو چې دا پروژه به درې کاله وخت ونیسي او د کابل شاوخوا دوه میلیونه اوسیدونکو ته به د څښاک اوبه برابرې کړي.
روسیه په نړۍ کې یوازینی هیواد دی چې د طالبانو حکومت په رسمیت پیژندلی.