د کابل هوایي ډګر ته نن اکثره نړیوالې الوتنې لغو شوي، کورني پروازونه بیا په خپل ځای دي
په افغانستان کې د انټرنیټ له پرچاوۍ سره همهاله کابل ته د نړیوالو الوتکو پروازونه له ځنډ او خنډ سره مخامخ شوي دي.
د هوایي ټرافیکو د څار یو نړیوال ویبسایټ ( فلایټ رادار ۲۴) ښيي چې نن سه شنبه کابل ته پنځه نړیوالې الوتنې لغو شوي چې درې یې له دوبۍ او دوه نورې له ستانبول او مسکو څخه پلان شوې وې.
د دغه ویبسایټ معلومات ښيي چې له کابل څخه هم نن سه شنبه دوبۍ ته دوه او ستانبول ته یوه پلان شوې الوتنه لغو شوې ده.
لغو شوې الوتنې تر ډیره د نړیوالو شرکتونو له هغې ډلی ترکیش او فلای دبۍ پروازونه دي.
یوشمیر بهرنیو ښارونو له هغې ډلې نوي ډیلي، ستانبول، جدې او ریاض ته بیا نن پروازونه پلان شوي چې دا خدمتونه تر ډیره د کام ایر او اریانا هوایي شرکتونو له خوا ترسره کیږي.
د افغانستان لویو ښارونو ته هم د دغو کورنیو هوایي شرکتونو الوتنې پر خپل ځای دي او په ظاهره له کوم خنډ سره نه دي مخ شوي.