د پاکستان پوځ وایي، تیره شپه یې بنو او لکي مروت کې پر (ټي ټي پي) عملیات کړي
د پاکستان پوځ وایي چې د خیبرپښتونخوا په بنو او لکي مروت ولسوالیو کې یې د تحریک طالبان پاکستان یا ( ټي.ټي.پي) ۳۱ غړي وژلي دي.اسوشیتید پریس خبري اژانس د پوځ د نننۍ ( دوشنبه، د وږي ۲۴مه) خبرپاڼې په حواله ویلي چې دغه عملیات تیره شپه شوي، خو جزیات یې نه دي ورکړي.دا عملیات وروسته تر هغو کیږي چې د شنبې په ورځ ډیورنډ کرښې ته څېرمه د پاکستان ۱۹ تنه پوځیان د وسله والو په بریدونو کې ووژل شول.د دغو بریدونو پړه تحریک طالبان پاکستان منلې وه.پاکستان کې په وروستیو کلونو کې پر امنیتي ځواکونو او پوځیانو بریدونه زیات شوي او د هغه هېواد چارواکي وایي، دا بریدونه ټي.ټي.پي د افغانستان له خاورې پلاوي.د طالبانو حکومت بیا تل دا تورونه رد کړي دي.