بقايي؛ امریکا باید روښانه کړي چې له ایرانه کوم بندیزونه لیرې کوي
د ایران د بهرنیو چارو د وزارت ویاند اسماعیل بقايي وايي، تراوسه د داسې څه شاهد نه دی چې د امریکا موقف دې پر ایران د بندیزونو په اړه بدل شوی وي.
د رویترز خبري اژانس د راپور له مخې بقایي نن دوشنبه ویلي، " دا باید روښانه وي چې امریکا له ایرانه کوم ډول بندیزونه لیرې کوي څو د تیر وخت تجربې تکرار نشي".
پرون یکشنبې وال سټریت ژورنال د سپینې ماڼې د ویاندې کارولین لویت په حواله ویلي و، " سپینې ماڼې تیره اونې د امریکا د ملي امنیت له شورا، د بهرنیو چارو او خزانې وزارتونو څخه په یو لیک کې د ټولو هغوو فعالیتونو د دریدو غوښتنه کړې وه چې د ایران پر ضد دي".
له دې وړاندې سپینې ماڼې ویلي و، د ایران د اټومي پروګرام هوکړه د دې هېواد په ګټه ده.
د ایران او امریکا ترمنځ د اټومي پروګرام په اړه خبرې اترې د روان کال په وري میاشت کې پیل شوي چې تراوسه دواړو خواوو ترمنځ پنځه ځلې سره خبرې اترې شوي دي.