په غزه کې روغتیايي چارواکو ویلي چې، د اسرايیل ځواکونو نن سهار وختي د دغه قلمرو په شمالي ښار بیت لاهیا کې یو انډونیزیايي روغتون کلابند کړی او د توپونو ډزې یې ورباندې کړې دي.
د دغه روغتون مشر مروان سلطان وویل، د اسرايیل ټانکونو دغه روغتون په بشپړ ډول محاصره کړی، برېښنا یې ورباندې بنده کړې او د روغتون دویم منزل د توپونو په مرمیو ویشتل شوی دی.
بلخوا د غزې روغتیا وزارت ویلي چې اسرايیل د روغتون پورتني پوړونه په نښه کړي او زیاته کړې یې ده چې هلته د روغتیايي کارکوونکو تر څنګ تر ۴۰ ډېر ناروغان او ټپیان هم موجود وو.
اسرايیل د دې میاشتې په پیل کې د غزې په شمال کې نوي پوځي عملیات پیل کړل او ویې ویل چې په دغو عملیاتو کې د حماس جګړه مار په نښه کوي.
د امریکا متحدهایالتونه او اروپايي ټولنه حماس ډله یو تروریستي سازمان ګڼي.
