د ایران په لږترلږه شپاړسو ښارونو کې د متقاعدینو د اعتراضونو په ترڅ کې د پولیسو له خوا د یو شمېر معترضانو د نیولو راپورونه ورکړل شوي دي.
پرون دوشنبې د ایران د پلازمېنې تهران او کرج، زنجان، آصفهان، آراک، کرمان، آهواز، مشهد، شیراز په ګډون په لږترلږه شپارسو ښارونو کې خلکو مظاهرې وکړې.
د ایران د کارګرانو خپلواکۍ اتحادیې ویلي، چې ټاکل شوې وه په تهران کې د متقاعدینو اعتراضیه لاریون د برنامې او بودجې د سازمان په مخ کې وشي خو د زیاتو امنیتي ځواکونو د حضور له امله یې مخنیوي وشو.
دې اتحادیې ویلي، چې یو شمېر معترضان د ښځینه او نارینه پولیسو له خوا ونیول شول او یوه نامعلوم ځای ته ولېږدول شول.
د شیراز د اعتراض په اړه په خپرو شویو ویډیوګانو کې ښکاري چې یو شمېر معترضان ځیني شعارونه له له ځان سره لېږدوي چې په کې لیکل شوي "زموږ دسترخوان خالي دی."
د راپورونو له مخې په تبریز کې له معترضانو سره نور خلک هم یوځای شوي و او د حکومت ضد شعارونه یې ورکول.
د پرونیو اعتراضونو ګډونوالو غوښتنه کوله چې په تنخواو کې کې انډول رامنځته او د متقاعدینو میاشتۍ تنخواوې دې لس سلنه زیاتې شي.
په وروستیو کلونو کې په ایران کې متقاعدینو، ښوونکو او کارګرانو د خپل معیشت د وضعیت پر وړاندې په کراتو کراتو اعتراضونه کړي دي چې ډېرځلې د امنیتي ځواکونو له سخت غبرګون سره مخ شوي دي.
د ایران اقتصاد چې د امریکا له خوا پر دې هېواد د لګول شویو اقتصادي بندیزونو له امله له مخکې ځپل شوی، د کرونا خپرې شوې وبا هم ډېر زیانمن کړی او ویل کېږي د کورونا له امله شاوخوا دوه میلیون کسان بې کاره شوي دي.
د رسمي شمېرو له مخې په ایران کې د انفلاسیون یا تورم کچه اوس په سلو کې ۴۵ ده.
